DISKURSU REITOR DIT IHA SEREMONIA GRADUASAUN ...

47232151_2295891270434454_7154362694097698816_n

DISKURSU REITOR DIT IHA SEREMONIA GRADUASAUN DALA SANULU TINAN 2018

by dit dili

02 Dec 2018

 

Hau nia Respeitu ba:

Ministru Edukasaun no Kultura

Prezidente Board of Trustees

Prezidente Konselhu Permanente Board of Trustees

Membru Board of Trustees

Magnifiku Reitores husi universidade hotu

Parseiru DIT

Inan Aman Graduadus no Graduadus sira mak hau hadomi

Senhoras no Senhores

Bomdia,

Bemvindu mai iha knua Dili Institute of Technology.

Ohin 29 Novembru 2018, sai hanesan momentu importante dala ida tan ba vida akademika iha Dili Institute of Technology. Tan nee ksolok boot ba hau nudar Reitor no Prezidenti Senadu Akademiku DIT hodi dala ida tan konfere grau akademiku ba estudante finalista sira.

Distintu konvidadu, graduadu ho inan-aman sira,

Ho onra boot, Dili Institute of Technology hakarak aprezenta ba publiku katak total estudante finalista nebee tuir seremonia graduasaun ba dala sanulu iha tinan 2018 hamutuk 410. Husi total ida nee, School of Engineering and Science (ema nain 99), School of Petroleum Studies (ema nain 146), School of Business and Management ((ema nain 75), ho School of Tourism and Hospitality (ema nain 95).

Distintu konvidadu, graduadu ho inan-aman sira mak hau respeita,

Iha momentu solene ida nee, permiti hau nuudar reitor atu hatoo dezenvolvimentu nebe DIT hahu tiha ona no kontinua halo.

Primeiru, kontinua hadia no redezenhu kurrikulum nunee reprezenta duni DIT nian kompetensia principal ka Core competence.

Segundu, husi programa estudus hamutuk 12, husi nee 5 mak akreditadu ona mak: Civil Engineering/Konstrusaun Sivil, Petroleum Engineering/Enjenharia Petroliferu, Finance Management/Jestaun Financas, Tour & Travel Management/Jestaun Viagem, no Jestaun Otelaria/Hotel Management. Fulan oin, Programa estudus hamutuk 3 mak sei hetan akreditasaun Programatiku.

Terseiru, Rekursu pesoal. Agora daudaun DIT iha staf permanente hamutuk 183. Hui numeru nee, dosente hamutuk 131 nebe kompostu husi doutoradu hamutuk 7, kandidatu doutor hamutuk 9 no sira seluk ho nivel mestradu. Tinan ida nee, dosente DIT nian nebe akaba tan estudu iha nivel mestradu hamutuk nain 4 no doutoradu aumenta tan nain 3. Tinan ida nee mos dosente konvidadu husi universidade rai liur ho grau Full Professor e agora daudaun hanorin iha DIT hamutuk nain 5.

Koartu, Fasilidade. Atu prosesu aprendizazen lao ho diak nafatin, DIT kontinua investa makaas iha fasilidade oi-oin. Tinan ida nee laboratoriu estudus petroliferu nian instala komputador foun ho kualidade diak nian. Laboratoriu departamentu computer science/siensia komputador mos instala komputador foun hotu ho kualidade diak nian. Sala hanorin hotu-hotu monta kamera CCTV. Ida nee ho intensaun katak administrasaun akademik DIT nian bele kontrola ho diak dosente sira tama hanorin tuir orariu-sai tuir oras no li-liu labele falta hanorin estudante. DIT hahu dau-daun monta televizaun 75 inch iha sala hanorin. Ida nee hodi fasilita dosente sira hanorin ho diak liu tan. Estudante DIT mos agora selu osan eskola nian la presija ba dook tamba Banku BNCTL loke ona “Cabang” BNCTL ida iha DIT hodi fasilita estudante sira selu osan eskola no mos nakloke ba publiku atu halo transaksaun.

Kintu, Sistema Informasaun Akademiku DIT SMART. Ho ida nee Estudante DIT agora bele hare orariu, rezultadu apredizajen, trata karta lisensa, karta estajiu, asesu referensia livros no monografia DIT nian, no informasaun akademiku seluk liu husi sira nia HP ka laptop.

Sestu, dezde 2013, DIT hahu tiha ona introdus lingua ingles intensivu iha prosesu aprendijazen DIT nian liu husi Eskola Superior Turizmu no kontinua ho Eskola Superior Siensia enjinaria. Tinan 2018 nee, lingua ingles introdus tomak ona iha programa estudus hotu-hotu DIT nian.

Setimu, tinan ida nee mos DIT hahu tiha ona loke Programa PosGraduasaun Nivel Mestradu. Programa nee rasik hetan tiha ona avaliasaun husi ajensia akreditasaun nasional ANAAA no hetan ona lisensa husi ministeriu edukasaun.

Oitavu, Auditoria ba planu no ezekusaun orsamentu annual DIT nian. DIT mos konvida auditoria publiku hodi halo audit ba orsamentu annual 2014, 2015, 2016, 2017 DIT nian. Ida nee hodi promove boa governasaun ba fiar nebe publiku no inan aman sira tau mai iha DIT.

Distintu konvidadu, graduadu ho inan-aman sira mak hau respeita,

Tema graduasaun iha tinan ida nee mak “Papel Ensinu Superior Iha Timor Leste Hodi Hasoru Era Dizitalizasaun Teknolojia Informasaun Iha Revolusaun Industria 4.0”. Tema ida nee fo hanoin no atensaun ba ita hotu katak mudansa boot teknolojia iha tempu besik nee sei lori ita ba esperiensia nebe ita nunka senti, hare, no hasoru iha tempu pasadu ba ita nia vida moris tomak. Ensinu Superior tenki rapidu no propriu hataan ba dezafiu nee hodi nunee bele hasae kompetitividade nasaun Timor Leste iha era nebe nivel kompetisaun aas tebes. Tamba nee Ensinu Superior obrigatoriu reformula politika estratejikas iha aspeitu hotu, hahu husi nivel instituisaun, kurikum, rekursus, fasilidades, iha ambitu kreatividade no inovasaun.

Graduadu sira mak hau respeita,

Seremonia graduasaun hanesan ultimu eventu akademiku nebe imi partisipa iha DIT. Ohin imi simu ona imi nia sertifikadu lisensiadu. Imi nia susesu nebee ohin ita selebra liu husi seremonia solene nee foin maka pasu primeiru. Ohin mos imi too ona iha odamatan mundu. Lao ba labele tauk, halo no hakerek imi nia istoria rasik iha mundo. komesa aban imi sei enfrenta dezafius barak liutan, situasaun problematiku boot liu tan. Husu ba graduadu sira atu sai solusaun ba situasaun hirak nee. Husu ba graduadu hotu atu sai nafatin estudante, atu sai nafatin alunus durante imi nia vida tomak. Ho nunee imi sei amprende nafatin saida mak imi nia esperensia, saida mak imi nia vida moris sei hanorin ba imi. Graduadu sira, husu ba imi atu uza matenek nee hodi serbii, hodi halo transformasaun ba ita nia familia, kolega, e transforma ita nia nasaun. Imi agora sai ona embaxador perfeitu DIT nian ba komunidade, tamba nee, hatudu ba komunidade katak DIT laos boot deit iha naran maibe nia graduadus mos iha kualidade atu kontribui ba dezenvolvimentu.

Exelencias,

Ikus liu aproveita oprtunidade nee, hau hakarak taka diskursu nee ho hatoo obrigadu wain ba:

  • Governu Timor-Leste, liu husi Ministeriu Edukasaun, the University of Western Australia, Victoria University, Australia, Universitas Udayana, Australian Volunteer International (AVI), Volunteers Service Abroad (VSA), New Zealand, Engineers Without Borders, MPRM, INAP, ANP, Timor-Gap EP, Conoco-Phillps, Slumberger, Bank Mandiri, BNCTL, KIESPTL no seluk tan nebe ami labele temi ida-ida nebee sai parseria diak ba DIT.
  • Hau mos hatoo agradese wain ba inan-aman graduadu sira nebee fo fiar ba DIT hodi eduka imi nia oan sira.
  • Mos hatoo obrigadu wain ba sivitas akademika DIT hotu ba imi nian vontade diak, komitimentu makas ho servisu la kolen no solidu hodi lori DIT too hetan naran diak iha sosiedade ho industria.
  • Ikus liu lori familia boot DIT nia naran hatoo gracias ho profisiat ba graduadu ho nia inan aman-sira. Espera imi hotu susesu iha imi nia kareira.

Obrigadu.

Dili, 29 Novembru 2018

Dr. Alvaro Menezes, M.Sc

Reitor DIT