Reitor DIT, Alvaro M. Amaral, PhD: SERVIS NO ...

DSC_0434

Reitor DIT, Alvaro M. Amaral, PhD: SERVIS NO DISIPLINA SAI FATOR SAVE HADIA KUALIDADE

by dit dili

25 Oct 2017

 

Servis ho disiplina sai fator determinante hodi hadia kualidade ensinu, tanba servis nebee diak ho kualidade sei tulun hadia satisfasaun estudante ho komunidade ba DIT, hatoo Reitor DIT, Alvaro M. Amaral, PhD iha Knua DIT (24/10/2017). Sremonia toma pose ofisial DIT asisti husi familia boot DIT.

Alvaro mos hatutan katak fator haat mak DIT sei konsentra hodi hadia. Ida, disiplina staf sira hodi hanorin diak, tuir tempu, silabus, no mata dalang nebee iha ona. Rua, DIT sei hadia atendimentu ba estudante, nunee estudante satisfeitu aprende iha DIT. Tolu, DIT sei hadia fasilidade hanorin liu-liu sala hanorin, lab, ho biblioteka. Nunee bele tulun estudante hetan hanorin nebee kualidade. Dahaat, DIT sei hadia diak liu tan jestaun finansa hodi asegura jestaun finansa DIT nian efisienti, efiskasi, transparenti no akuntavel. Nunee agora ba oin ita sei halo disiplina orsamental, uza osan didiak hodi hadia kualidade hanorin.

Iha fatin hanesan, Estanislau Saldanha, nudar Prezidenti Konselhu Permanenti BOT-DIT, no mos eis Reitor DIT hatoo ba ofisial DIT sira nebee hetan pose katak pozisaun nebee hetan ona nee hanesan fiar ida. Nunee buka servisu diak, makas no prova ba ema seluk katak imi bele. Pozisaun nebee imi hetan nee laos buat hotu, maibe fatin ida ba imi hodi serbii. Imi buka uza pozisaun nee hodi halo buat diak ruma iha imi nian unidade, nunee bainhira imi sai karik, imi nian obra ka ain ho liman fatin sei hela, no ema hare hetan, hatutan Estanislau.

Ofisial DIT sira nebee hetan Pose mak Vital Baretoo, B.Bus, MM nudar Pro-Reitor Akademiku, Joao Bosco Belo, B.Eng., M.Eng. nudar Pro-Reitor Rekursu, Administrasaun, ho Pesoal, Francisco Cosme Gama, B.Eng., M.M., nudar Pro-Reitor Planu ho Kooperasaun Externa, Eng. Marito Menezes, nudar Diretor Exekutivu Dezenvolvimentu Infratrutura, Teotino Soares, B.Sc, MSc, Diretor Administrasaun, Avaliasaun ho Kontrola Kualidade Akademika, Octavianus Christo Parera, ST, M.Comp, nudar Diretor ICT, Elianora Carvalho, B.Bus, M.M., nudar Dekana School of Business and Management, Armindo Coelho, B.Bus, nudar Koordenador Teknika Personalia, ho Abilio Soares, B.Eng. nudar Koordenador Tekniku Logistika.ESA